Taqvaylit n tidet, tlelli war tilas

Abrid ara taɣ Tiliẓri n TQ5

TQ5 d tiliẓri tanmatut s tutlayt taqbaylit. Iswi-s amenzu d asnezwi d usɛeddi n wahilen ara yilin d udem n wazalen igejdanen s wacu i teddes tmetti taqbaylit, d asnezwi n wahilen-a ara d-yefken afus n tallalt i usnerni n yidles, n tutlayt, n wansayen n tmetti-nneɣ akked usissen n tnekkit taqbaylit s umata ama deg tmurt n yiqbayliyen yakan, ama deg tefriqt ugafa tamaziɣt neɣ deg umaḍal akken ma yella. TQ5 d adeg anida tilelli n wawal ur tesɛi ara azaglu, d adeg anida i ulac tikkin ɣer tesnaktiwin tisertanin neɣ n tesreḍt. TQ5 d axxam ara yeldin tiwwura-is i wid akk yettqadaren azalen addayen n talsa d wid n tiɣermi d umesfara akked tikli ɣer sdat. Gar wazalen-a ad d-nebder : Tagada gar tmeṭṭut d urgaz, tilelli n wawal d umeslay, Aqader n tmeẓliwin, ama deg ccetla ama deg tesreḍt ama deg wayen akk yessemgiriden gar yemdanen.

Imirwen n TQ5 

1.     Idles, Taẓuri akked tussna

Tuɣdaḍt d leqrar n TQ5 d asekcem n teqbaylit ɣer wallalen n tetiknulujit d wallalen n teywalt atraren, Asenfar-a ad d-yili s leqdic akked yimussnawen d tmussnawin iqbayliyen i yettidiren deg tmurt taqbaylit neɣ berra n tmurt taqbaylit. S uzekka, timetti taqbaylit s lekmal-is, seg ugrud ɣer win wessaren, ad izmiren ad ttwalin, ad sellen, ad ẓerren ahilen iccudden ɣer taɣulin yemgaraden, am tussna, taẓuri, tasekla d yidles s wudmawen-is i merra s tutlayt taqbaylit. Anecta ad d-yer tayri gar tmetti taqbaylit d tutlayt-is. TQ5 ad d-lethi daɣen d tmiḍranin timazrayin n yal tallit, xas ula d tid i aɣ-dyeǧǧan ccwami, amezruy-nneɣ d agerruj ur nufi ɛad, ur nessin ɛad. TAQ5 ad astefk tamuɣli i yizri-nneɣ aqbayli akked win yimaziɣen akken ma llan.

2.     Aɣref Aqbayli (At tmurt, d At berra n tmurt)

TAQ5 d tin ara yewwten, s wayen akk i tezmer, ad d-terr tadukkli gar yiqbayliyen anida ma llan, deg tmurt taqbaylit yakan, neɣ anida bɣun ilin deg umaḍal. S tdukkli-ya ara teddu teqbaylit d wayen yellan deg-s ɣer sdat, S tdukkli-ya ara s-d-tuɣal tezmert d tbaɣurt i tla deg umezruy, S tdukkli-ya ara yettwakkes nkeṛ d ugami i ɣ-ugin acḥal d tallit-aya.

3.     Tagrudant d yilemẓiyen

Tekkat TQ5 ad tmudd i warrac d yilemẓiyen izwawen ahilen isegmiyanen yesbuɣaren, akked tegnit n usenfali i yettakken azal i yizri-nsen, yesɣentir amha-nsen, yeddeggir-iten ɣer yimal n war ilmawen idelsanen d uɣunzu n yiman. TQ5 ad teqdec war ḥebbus i uḥuddu n yilemẓiyen izwawen mgal ilɣagduden yetthuddun i iɛewwlen ad ten-mmɣen deg tqebbanit d uleqqef.

Yessefk ɣef yilemẓiyen izwawen ad zuxen s tmagit-nsen, ad ilin umren deg yidles-nsen, ttyeqqnen dakken ilaq kan ad qedcen fell-asen akken mačči kan ad ten-id-sellken seg nnger, maca ad ten-sfeǧǧen ugar deg umaḍal, s tarwa i izemren i tenfusin timeqqranin.

4.     Adderfi n tmeṭṭut

Yesselmad-aɣ umezruy dakken afara n waɣlanen d yiɣerfan n umaḍal ulamek ad d-yili war adderfi n tlawin i ten-iɛemren. TQ5 ad tili d tagnit n tferni iwakken ad tenǧem tameṭṭut tazwawt ad tesbeyyen tikci-ines deg yakk tiɣula, ad tekki s tehri deg yiskasiyen, ad tebnu timetti i ara d-yerren i wayen tessaram.

5.    Tutlayt

Ad d-tezzuzzur TQ5 agbur imed d amesnulfay ara yewten ad yesselɣu, ad irebbi, ad yessedhu, ad yessegmek deg tutlayt tazwawt merra tisutiwin n Yizwawen anda ma bɣun ilin deg umaḍal.

Ilugan n tuqenwalt tasadart

Akken ad nessemres akk nnwabi-a icaḍen, ttɛahaden terbaɛt i yesselḥuyen d yimsaduren n TQ5 ad qedcen deg uqader n yimenzayen n uselḥu d yilugan n tuqenwalt i yellan ɣer wadda :

1.     Timunent/tamelhut d tmasayt

Taflest d leqder n ugraw n yiqvayliyen almend n TQ5,icudd ɣer tmunent n tgejdit-is d tmelhut n yimasayen d yixeddamen-is. Iveddi s lqed deg unamek-a,d wazal n umahil n wid ikkin deg useddu ines,d ayen ad iṛeṣṣin ɣef llsas akk ahil n TQ5.

2.     Asefrek usdid,uzdig n yisalli

I uṛeṣṣi n teflest akked yimeshanayen d wid akk ikkin neɣ.daɣ wid s wudem usrid,i ḥuzan wahilen n TQ5 deg useddu agejdan,yewwi-d ad yili d usdid,d uzdig.

3.     Tawartarayit/tavberrart/timeẓriwt

TQ5,ad tṛeṣṣi tiṭ ɣef usegrew d usenked n yisallen akken ad ilin gdan,almend n yisuḍaf,iseddayen taɣamsa s tarrayt tuɣdimt deg umaḍal. Deg uzrar n wakud,TQ5,di tmuɣli-s ad tesenked yiwen wahil,s waṭas n yisental,iṛeṣṣan ɣef tirmitin yemgarden,s leqdic n yixeddamen-is,neɣ daɣ si tama n yinfarsen d yimazzayen di taɣult-a. Tawartarayit-a,ur d-tesutur akud agdan i yal tamuɣli neɣ akken udmawen n yal asfukel ad ilin ttusnekden.

4.     Tiferni d wusdid

TQ5, ad teg akken tamuɣli-s,ɣef i irzan asegrew d usenked n tullisin d yisallen,ad ilin d usdiden,gdan anamej di tlisa isefraken taɣamsa deg umaḍal. TQ5,ad tefk akk tazmert-is tuɣẓint i tiddin s wudem ufrin,yal ahil iṛeṣṣan ɣef tedyanin yeḍran.

Alugen n utebbet n TQ5 yebna ɣef leḥsabat n wayen yeḍran, ur ɣef tenfaliyin n rray. Ilaq ad d-ɛeddin rryuy s uqisi s wudem amek ad ilint tnebdurin banent, d wamek ur yessettwaɣay usebded anamek n rray i d-yettunefken. Lɛehd n ttbut ilaq ad yamed s unadi anagrawan n useɣti yezdigen n tuccḍiwin i izemren ad ilint, d usbeyyen n telɣa i ara d-ibanen luɣent. Iseɣtiyen d ubeyyen ad kkin deg tummda d tizzurga n TQ5.

5.     Aqader n tudert tusligt

Aqader d uḥuddu n tudert tusligt ssefken i lḥerma talsant. Yal amdan ara d-yeddun d TQ5 yesɛa azref ad tettuqader tudert-is tusligt. Ɣas ur telli tbaḍna tafellayt, ad tnadi TQ5 dima asemsawi gar uqader n tudert tusligt d ubaɣur azayez i uberreḥ s telɣut d tlelli n umeslay.

6.     Aḥuddu n teɣbula n telɣut

Ad teḍmen TQ5 i yineɣmasen-is azref i useḥbiber ɣef tuffra n nnekwa-nsen d tlelli n umeslay n teɣbula-nsen n telɣut. TQ5 ad tḥudd ineɣmasen-is ɣef yakk aḥras i ara yenwun ad asen-yekkes azref amenzu n uneɣmas.

7.     Akcam d tikkin n uzayez

Ad tefk TQ5 tignatin i medden d tuddsiwin ma bɣan ad d-ddun d TQ5 neɣ d tmesfeldit-ines, ɣef leḥsab n yiswan d yilugan n uqeddic n TQ5 i uselɣu, i usedhu, i urebbi, i usebɣes d usnerni n tẓuriwin, n yidles, n tussna, d uḥuddu n twennaḍt d wayen yakk yellan d abaɣur n uɣref azwaw anda ma yebɣu yili